متھرا: شری کرشن جنم بھومی مندر تنازعہ میں عرضی گزار اور ہندووادی رہنما پھلاہاری مہاراج نے شاہی عیدگاہ کمیٹی کو خط لکھ کر مسلم فریق کے سامنے مفاہمت کی پیشکش رکھی ہے۔ انہوں نے شاہی عیدگاہ کی تقریباً 2.25 ایکڑ زمین کے بدلے میوات میں 20 ایکڑ زمین دینے کی پیشکش کی ہے۔

پھلاہاری مہاراج نے کہا کہ اگر مسلم فریق عدالت سے باہر باہمی رضامندی سے معاملہ حل کرنا چاہتا ہے تو وہ اس کے لیے تیار ہیں۔ ان کے مطابق میوات میں مسلم آبادی زیادہ ہے اور وہاں مسجد کی تعمیر کے اخراجات میں بھی تعاون کیا جا سکتا ہے۔

واضح رہے کہ شری کرشن جنم بھومی تنازعہ کی سماعت کے دوران سپریم کورٹ نے ہندو اور مسلم فریقین کو آپس میں بات چیت کے ذریعے معاملہ حل کرنے کے لیے متھرا لوک عدالت کا راستہ اختیار کرنے کی اجازت دی تھی۔ تاہم، ہندو فریق لوک عدالت میں موجود ہوا، جبکہ مسلم فریق کی جانب سے کوئی نمائندگی نہیں ہوئی، جس کے باعث معاملہ آگے نہیں بڑھ سکا۔

پھلاہاری مہاراج نے اپنے خط میں بھائی چارے اور باہمی رضامندی کے ساتھ تنازعہ حل کرنے پر زور دیا۔ انہوں نے یہ بھی کہا کہ اگر مسلم فریق ثالثی کے لیے سماج وادی پارٹی کے رہنما اکھلیش یادو کو شامل کرنا چاہے تو انہیں اس پر کوئی اعتراض نہیں ہوگا۔

انہوں نے کہا کہ متھرا محبت اور بھائی چارے کی سرزمین ہے اور دونوں فریقوں کو باہمی تعاون کے ذریعے معاملہ حل کرنے کی کوشش کرنی چاہیے۔