حیدرآباد اور اس سے ملحقہ چار پولیس کمشنریٹس کی ٹریفک پولیس نے ہفتہ وار خصوصی مہم کے دوران شراب پی کر گاڑی چلانے والوں کے خلاف کارروائی کرتے ہوئے مجموعی طور پر 982 مقدمات درج کیے۔ ان میں زیادہ تر خلاف ورزیاں دو پہیہ گاڑیاں چلانے والوں کی رہیں۔ حیدرآباد ٹریفک پولیس نے 21 اور 22 اگست کو 404، سائبر آباد نے 261، ملکاجگیری نے 241 جبکہ فیوچر سٹی ٹریفک پولیس نے 76 افراد کے خلاف مقدمات درج کیے۔

پولیس کے مطابق تمام افراد کو عدالت میں پیش کیا جائے گا۔ حکام نے خبردار کیا کہ شراب کے نشے میں گاڑی چلانے کے خلاف سخت کارروائی آئندہ بھی جاری رہے گی۔ سائبر آباد، فیوچر سٹی اور ملکاجگیری پولیس نے کہا کہ اگر کوئی شخص نشے کی حالت میں گاڑی چلاتے ہوئے جان لیوا حادثے کا سبب بنتا ہے تو اس کے خلاف بھارتیہ نیائے سنہتا 2023 کی دفعہ 105 کے تحت مقدمہ درج کیا جا سکتا ہے، جس میں 10 سال تک قید اور جرمانہ کی سزا ہو سکتی ہے۔

پولیس نے بتایا کہ پہلے سے درج مقدمات میں بھی عدالتوں نے کارروائی کرتے ہوئے متعدد ملزمان پر جرمانے عائد کیے، بعض کو سماجی خدمت کی سزا دی گئی جبکہ ایک ملزم کو جرمانے کے ساتھ جیل بھیجنے کا حکم دیا گیا۔ ٹریفک پولیس نے عوام سے اپیل کی کہ وہ شراب پی کر گاڑی چلانے سے گریز کریں، ٹریفک اہلکاروں سے تعاون کریں اور سڑکوں پر حفاظت کو یقینی بنانے میں اپنا کردار ادا کریں