حیدرآباد، 25 اگست: تلنگانہ میں ووٹر لسٹ کی اسپیشل انٹینسیو ریویژن (SIR) کے دوران نوٹس حاصل کرنے والے ہر ووٹر کے لیے ذاتی طور پر سماعت میں حاضر ہونا ضروری نہیں ہوگا۔

تلنگانہ چیف الیکٹورل آفس کے عہدیداروں کے مطابق، ایسے سیلیبریٹیز، وی آئی پیز، صنعت کاروں اور معمر افراد جن کے ریکارڈ میں بے ضابطگیاں پائی گئی ہیں یا جن کے نام SIR 2002 کی ووٹر لسٹ سے میپ نہیں ہو سکے، وہ سماعت کے لیے اپنے خاندان کے کسی فرد کو نمائندہ مقرر کرسکتے ہیں۔

مجاز نمائندے کو ووٹر کے اصل دستاویزات الیکٹورل رجسٹریشن آفیسر (ERO) یا اسسٹنٹ الیکٹورل رجسٹریشن آفیسر (AERO) کے سامنے پیش کرنا ہوگا۔ یہ سہولت تلنگانہ سے باہر مقیم افراد اور دائمی بیماریوں میں مبتلا ووٹرس کے لیے بھی دستیاب ہوگی۔

ایک سینئر عہدیدار کے مطابق ذاتی حاضری سے استثنیٰ حاصل کرنے کے لیے ووٹر کو ERO کے پاس اجازت نامہ جمع کرانا ہوگا۔ استثنیٰ دینے کا فیصلہ ERO کرے گا۔ اگر افسر دستاویزات یا وضاحت سے مطمئن نہ ہو تو ووٹر کو دوبارہ ذاتی سماعت کے لیے طلب کیا جاسکتا ہے۔

تلنگانہ CEO کے مطابق 60,50,918 ووٹرس کے فارم میں موجودہ ووٹر لسٹ اور گزشتہ SIR لسٹ کے درمیان نام یا عمر میں فرق سمیت مختلف بے ضابطگیاں پائی گئی ہیں۔ جبکہ 32,36,659 ووٹرس کے نام SIR 2002 کی ووٹر لسٹ سے میپ نہیں ہو سکے ہیں۔

اب تک 1.50 لاکھ سے زائد ووٹرس کو نوٹس جاری کیے جاچکے ہیں، جبکہ تقریباً 75 لاکھ نوٹس EROs اور AEROs کی جانب سے ڈاؤن لوڈ کیے گئے ہیں۔ نوٹس کی پرنٹنگ کے بعد Booth Level Officers (BLOs) انہیں ووٹرس تک پہنچائیں گے اور نوٹس کی وصولی کے ثبوت کے طور پر دستخط اور تصاویر بھی حاصل کریں گے۔

ووٹرس اپنے متعلقہ دستاویزات Voters Portal یا BLO App کے ذریعے بھی جمع کراسکتے ہیں۔ اس کے علاوہ وہ ERO یا AERO کے سامنے ذاتی سماعت میں حاضر ہوکر اپنے Enumeration Form میں موجود بے ضابطگیوں کی وضاحت کرسکتے ہیں۔

وہ ووٹرس جن کے نام SIR 2002 کی فہرست سے میپ نہیں ہوئے ہیں، انہیں ERO یا AERO کے سامنے اصل معاون دستاویزات پیش کرنا ہوں گے۔

عہدیداروں نے بتایا کہ 27 اگست سے گرام سبھاؤں کا انعقاد بھی کیا جائے گا، جہاں ووٹرس مطلوبہ اصل دستاویزات پیش کرکے ریکارڈ میں موجود بے ضابطگیوں کی اصلاح کراسکتے ہیں۔

تلنگانہ SIR کے اہم اعداد و شمار

کل ووٹرس: 3,38,26,448

جمع کرائے گئے Enumeration Forms: 2,64,87,213

ASDD کے تحت ووٹرس: 73,39,235

بے ضابطگیوں والے ووٹرس: 60,50,918

SIR 2002 سے میپ نہ ہونے والے ووٹرس: 32,36,659

ڈاؤن لوڈ کیے گئے نوٹس: 75 لاکھ

سرو کیے گئے نوٹس: 1.50 لاکھ

سب سے زیادہ بے ضابطگیوں والے اضلاع

1. حیدرآباد: 6,72,678
2. رنگاریڈی: 5,60,201
3. نظام آباد: 3,91,453
4. سنگاریڈی: 3,47,682
5. میڈچل-ملکاجگیری: 3,34,252

سب سے زیادہ Unmapped ووٹرس والے اضلاع

1. میڈچل-ملکاجگیری: 10,72,599
2. رنگاریڈی: 6,72,979
3. حیدرآباد: 5,80,908
4. سنگاریڈی: 1,12,749
5. کریم نگر: 61,882

SIR کا شیڈول

Draft Electoral Roll پر Claims & Objections: 16 ستمبر تک

نوٹس اور Claims & Objections کی کارروائی: 15 اکتوبر تک

حتمی ووٹر لسٹ کی اشاعت: 19 اکتوبر

تلنگانہ CEO نے ووٹرس سے اپیل کی ہے کہ اگر انہیں SIR کے تحت نوٹس موصول ہوتا ہے تو مقررہ مدت کے اندر جواب دیں اور ضروری دستاویزات جمع کرائیں، تاکہ ووٹر لسٹ کی نظرثانی کے دوران کسی قسم کی دشواری پیش نہ آئے۔