سدی پیٹ: شہر کی سڑکوں پر شور اور عوام کو ہونے والی پریشانی کے پیشِ نظر سدی پیٹ پولیس نے ترمیم شدہ سائلنسرز استعمال کرنے والی دو پہیہ گاڑیوں کے خلاف خصوصی مہم چلائی۔ پولیس نے سدی پیٹ ٹاؤن میں تقریباً 240 گاڑیوں کی نشاندہی کی، جن میں کمپنی کے منظور شدہ سائلنسرز کے بجائے ترمیم شدہ سائلنسرز نصب تھے۔

پولیس کے مطابق ایسے سائلنسرز سے پیدا ہونے والے شدید شور سے بچوں، خواتین، بزرگوں اور اسپتالوں میں زیرِ علاج مریضوں کو کافی پریشانی کا سامنا کرنا پڑ رہا تھا۔ گاڑیوں کو ترمیم شدہ سائلنسرز ہٹاکر کمپنی کے منظور شدہ سائلنسرز لگانے کے بعد ہی چھوڑا گیا، جبکہ گاڑی مالکان کے خلاف مقدمات بھی درج کیے گئے۔ BJR جنکشن پر پولیس کمشنر رشمی پرومل اور دیگر عہدیداروں کی موجودگی میں ضبط کیے گئے 240 سائلنسرز کو روڈ رولر سے کچل دیا گیا۔

اس موقع پر کمشنر نے عوام سے اپیل کی کہ وہ ترمیم شدہ سائلنسرز کا استعمال نہ کریں۔ انہوں نے کہا کہ ضلع کے تمام پولیس اسٹیشن حدود میں اسی طرح کی خصوصی مہم جاری رکھی جائے گی اور خلاف ورزی کرنے والوں کے خلاف ماحولیاتی تحفظ ایکٹ کے تحت کارروائی کی جائے گی۔ انہوں نے مکینکس کو بھی ہدایت دی کہ وہ گاڑیوں میں ایسے سائلنسرز نصب نہ کریں۔

کمشنر نے نجی گاڑیوں میں غیر مجاز پولیس سائرن استعمال کرنے والوں کے خلاف بھی سخت کارروائی کا انتباہ دیا۔ عوام سے اپیل کی گئی کہ وہ ترمیم شدہ سائلنسرز یا غیر مجاز پولیس سائرن استعمال کرنے والی گاڑیوں کی تصاویر لے کر ٹریفک انسپکٹر کو 87126 67410 پر اطلاع دیں۔

کمشنر نے شہریوں سے ٹریفک قوانین کی پابندی کرنے، سگنل توڑنے، شراب پی کر گاڑی چلانے اور تین سواریوں پر سفر کرنے سے گریز کرنے کی اپیل کی۔ انہوں نے کہا کہ مختصر فاصلے کے سفر کے دوران بھی ہیلمٹ ضرور پہنیں، کیونکہ ٹریفک قوانین کی معمولی خلاف ورزی بھی جان لیوا حادثات کا سبب بن سکتی ہے۔