حیدرآباد، 23 اگست: تلنگانہ کے وزیر اعلیٰ اے ریونت ریڈی نے کہا ہے کہ اسٹارٹ اپس کی حوصلہ افزائی اور جدید ٹیکنالوجی کو فروغ دینے کے باعث تلنگانہ تیزی سے اسپیس ٹیک ہب کے طور پر ابھر رہا ہے۔ انہوں نے نیشنل اسپیس ڈے کے موقع پر سائنس دانوں، انجینئروں اور تکنیکی ماہرین کو مبارکباد پیش کی۔

وزیر اعلیٰ نے کہا کہ چندریان-3 کی کامیابی کے ذریعے ہندوستان نے چاند کے جنوبی قطب کے علاقے تک پہنچ کر دنیا کے سامنے اپنی سائنسی اور تکنیکی صلاحیت کا مظاہرہ کیا ہے۔ انہوں نے کہا کہ اس کامیابی کے پیچھے برسوں کی محنت، لگن اور مسلسل تحقیق شامل ہے اور اس عظیم کامیابی میں حصہ لینے والے ہر فرد کو وہ دل کی گہرائیوں سے مبارکباد پیش کرتے ہیں۔

ریونت ریڈی نے نوجوانوں پر زور دیا کہ وہ اختراعات کی جانب قدم بڑھائیں اور بڑے خواب دیکھیں۔ انہوں نے کہا کہ نوجوان عزم کے ساتھ اپنے خوابوں کی تکمیل تک آگے بڑھیں۔ سائنس ہماری طاقت، اختراعات ہمارا مستقبل اور خلاء ہماری اگلی منزل ہونی چاہیے۔