داووس (WEF 2026):
تلنگانہ کو بھارت کا نمایاں اے آئی ڈیٹا سینٹر حب بنانے کے لیے تلنگانہ رائزنگ 2047 وژن کے تحت وزیر اعلیٰ اے۔ ریونت ریڈی کی قیادت میں گئے وفد نے ایک اور بڑی کامیابی حاصل کی ہے۔ اس سلسلے میں نیدرلینڈز کی یو پی سی رینیوایبلز گروپ اور وولٹ ڈیٹا سینٹرز کے مشترکہ منصوبے یو پی سی وولٹ کے ساتھ مفاہمتی یادداشت (MoU) پر دستخط کیے گئے۔

یو پی سی وولٹ نے بھارت فیوچر سٹی میں 100 میگاواٹ کا جدید اور اے آئی ریڈی ڈیٹا سینٹر قائم کرنے کا اعلان کیا ہے، جس کے ساتھ 100 میگاواٹ کا راؤنڈ دی کلاک (RTC) قابلِ تجدید توانائی منصوبہ بھی ہوگا، تاکہ ڈیجیٹل انفراسٹرکچر کو کاربن فری توانائی سے چلایا جا سکے۔ اس منصوبے پر پانچ ہزار کروڑ روپے کی سرمایہ کاری کی جائے گی، جو پانچ برسوں میں مکمل ہوگی۔ اس سے تعمیر کے دوران 3,000 سے زائد براہِ راست و بالواسطہ روزگار اور آپریشن کے مرحلے میں 800 سے زائد ملازمتیں پیدا ہوں گی۔

یہ ڈیٹا سینٹر تلنگانہ کے گرین اوپن ایکسیس فریم ورک کے تحت قابلِ تجدید توانائی سے منسلک ہوگا، جس سے ایک پائیدار اور ماحول دوست پاور ماڈل قائم کیا جائے گا۔

داووس میں ہونے والی ملاقات میں وولٹ کے سی ای او ہان ڈی گروٹ، یو پی سی رینیوایبلز اے پی اے سی کے شریک بانی اسٹیون زوان، یو پی سی رینیوایبلز انڈیا کے سی ای او آلوک نگم اور اسسٹنٹ وائس پریزیڈنٹ وکاس شرما نے شرکت کی۔

وزیر اعلیٰ اے۔ ریونت ریڈی نے آئی ٹی و انڈسٹریز کے وزیر ڈی۔ سری دھر بابو کی کوششوں کو سراہتے ہوئے کہا کہ یہ سرمایہ کاری تلنگانہ کو 2047 تک تین ٹریلین ڈالر کی معیشت بنانے کے ہدف کی جانب ایک اہم قدم ہے۔ انہوں نے کہا کہ ریاست اعلیٰ معیار کے ڈیجیٹل انفراسٹرکچر کے ساتھ ساتھ نیٹ زیرو ترقی کے روڈ میپ پر بھی گامزن ہے۔

وزیر اعلیٰ نے کہا کہ تلنگانہ ہائی ڈینسٹی جی پی یوز، بڑے پیمانے پر اے آئی ٹریننگ کمپیوٹ اور لیکوئیڈ کولنگ جیسے شعبوں میں مراعات دے کر دنیا کا ایک بڑا اے آئی ڈیٹا سینٹر ہب بننے کی سمت تیزی سے آگے بڑھ رہا ہے۔
انہوں نے مزید بتایا کہ تلنگانہ رائزنگ 2047 وژن کے تحت ریاست میں تین الگ اقتصادی زون قائم کیے جا رہے ہیں، جو سروسز، مینوفیکچرنگ اور زراعت کے لیے مختص ہوں گے۔

اس وفد میں محترم وزیرِ ریونیو پونگولیٹی سرینواس ریڈی بھی شامل تھے، جنہوں نے اس ملاقات میں شرکت کی۔