حیدرآباد: 23نومبر (پٹریاٹک ویوز) تلنگانہ کی کانگریس حکومت کے قیام کے قریب ایک سال مکمل ہونے کے موقع پر وزیر ٹرانسپورٹ اور بی سی فلاحی محکمہ پوننم پربھاکر نے اسپیشل سکریٹری وکاس راج کے ساتھ مل کر ٹرانسپورٹ محکمہ کے افسران کے ساتھ ایک اہم جائزہ اجلاس منعقد کیا۔ اجلاس میں محکمہ کی کارکردگی اور آئندہ کے اہداف پر تفصیل سے گفتگو کی گئی۔

وزیر نے ٹرانسپورٹ محکمہ میں آمدنی بڑھانے کے لیے مقرر کردہ ہدف کو حاصل کرنے کی ضرورت پر زور دیتے ہوئے عوام کو کسی بھی قسم کی مشکلات میں ڈالے بغیر نئے آمدنی کے ذرائع تلاش کرنے کی ہدایت دی۔ انہوں نے مزید کہا کہ محکمہ میں طویل عرصے سے زیر التواء ترقیوں کو جلد مکمل کیا جائے۔

اجلاس میں اسکول بسوں پر مستقل چیکنگ کی ہدایت بھی دی گئی، خاص طور پر 15 سال سے زیادہ پرانی بسوں کو ضبط کرنے کا حکم دیا گیا۔ وزیر نے اسکول بسوں کی فٹنس، انشورنس، اور رجسٹریشن کی جانچ کرنے کی ہدایت دیتے ہوئے کہا کہ اسکول کے اوقات میں بچوں کی سکیورٹی پر کوئی سمجھوتہ نہیں کیا جائے گا۔

ای وی پالیسی پر بھی بات چیت کی گئی، وزیر نے عوام میں آگاہی بڑھانے کی ضرورت پر زور دیتے ہوئے کہا کہ تلنگانہ حکومت نے ملک بھر میں ماحولیات کی حفاظت کے لیے انقلابی قدم اٹھایا ہے۔ اس کے ساتھ ہی سی ایس آر فنڈز سے اسکولوں میں ٹریفک آگاہی پارک قائم کرنے کی تجویز سامنے آئی۔

اس اجلاس میں ٹرانسپورٹ محکمہ کے خصوصی سکریٹری وکاس راج، کمشنر ٹرانسپورٹ سورندرا موہن، جے ٹی سی رامی اور دیگر حکام نے شرکت کی اور مختلف منصوبوں کی پیش رفت پر تفصیل سے تبادلہ خیال کیا۔