حیدرآباد، 26 نومبر 2024: پٹریاٹک ویوز ۔ تلنگانہ گرین موومنٹ فار سٹیزنز (ٹی جی ایم ایف سی) نے اپنے ہیڈ آفس میں یوم آئین کی پُروقار تقریب کا انعقاد کیا۔ اس موقع پر معزز چیئرمین جناب محمّد عبیداللّٰہ کوتوال صاحب نے تقریب کی صدارت کی اور حاضرین کے ساتھ مل کر آئین ہند کی تمہید پڑھی۔ اس تقریب میں ادارے کے افسران اور عملے کے اراکین بڑی تعداد میں موجود تھے جنہوں نے اس قومی دن کی اہمیت پر زور دیا۔

آئین کی اہمیت اور جمہوری اقدار پر ایک تعارفی تقریر کی گئی۔ جناب محمّد عبیداللّٰہ کوتوال صاحب نے اپنے خطاب میں آئین کی تاریخی حیثیت اور اس کے بنیادی اصولوں پر روشنی ڈالی۔ انہوں نے کہا کہ آئین ہندوستان کا وہ بنیادی دستاویز ہے جو تمام شہریوں کے حقوق اور فرائض کی ضمانت دیتا ہے۔ انہوں نے مزید کہا کہ آئین کے اصولوں کی پاسداری کرنا نہ صرف ہر شہری کی ذمہ داری ہے بلکہ ایک مہذب معاشرے کی بنیاد ہے۔

تقریب کے دوران ٹی جی ایم ایف سی کے افسران اور عملے نے آئینی اقدار کے تحفظ اور ان پر عمل پیرا ہونے کے عزم کا اظہار کیا۔ تمام شرکاء نے اجتماعی طور پر عہد کیا کہ وہ عدل، مساوات، آزادی اور اخوت کے اصولوں کو اپنی زندگیوں کا حصہ بنائیں گے اور قومی اتحاد و سالمیت کو برقرار رکھنے کے لیے بھرپور کردار ادا کریں گے۔

اس موقع پر چیئرمین صاحب نے نوجوان نسل کو آئین کی تعلیم دینے اور ان میں جمہوری شعور پیدا کرنے کی ضرورت پر بھی زور دیا۔ انہوں نے کہا کہ ملک کی ترقی کے لیے ضروری ہے کہ ہم اپنے آئین کو نہ صرف سمجھیں بلکہ اس پر عمل بھی کریں۔

تقریب کا اختتام قومی ترانے کے ساتھ ہوا، جس نے شرکاء کے دلوں میں حب الوطنی کے جذبے کو مزید تقویت دی۔ ٹی جی ایم ایف سی کے اس اقدام کو عوامی اور سماجی حلقوں میں بھرپور سراہا جا رہا ہے۔