حیدآباد 28 نومبر (پٹریاٹک ویوز) تلنگانہ حکومت کی جانب سے پورے ملک کے لیے مثال بنتے ہوئے سماجی، اقتصادی، تعلیمی، روزگار، سیاسی اور ذات پر مبنی ایک جامع سروے کا انعقاد کیا جا رہا ہے۔ اس سروے کے تحت وزیر اعلیٰ ریونت ریڈی نے اپنے خاندان کی تفصیلات درج کروائیں۔

حیدرآباد کے کلکٹر انو دیپ، جی ایچ ایم سی کمشنر ایلومبرتی اور دیگر اعلیٰ عہدیداروں کے ساتھ سروے ٹیم نے جوبلی ہلز میں وزیر اعلیٰ کی رہائش گاہ پر ان کے خاندان کی تفصیلات کا اندراج کیا۔

وزیر اعلیٰ نے سروے کی پیش رفت اور عوام کے ردعمل کے بارے میں عہدیداروں سے تفصیلات حاصل کیں اور ہدایت دی کہ سروے کو جلد از جلد مکمل کرنے کے لیے مؤثر حکمت عملی اپنائی جائے۔ انہوں نے تمام سرکاری ملازمین کو سروے میں اپنی تفصیلات لازمی طور پر درج کرنے کی ہدایت کی۔

وزیر اعلیٰ نے حیدرآباد کے علاقے میں وی وی آئی پیز، آئی اے ایس، آئی پی ایس افسران، ایم پی، ایم ایل ایز اور دیگر عوامی نمائندوں کے لیے خصوصی ڈرائیو منعقد کرنے کا حکم بھی دیا، تاکہ ان کی معلومات بھی وقت پر جمع کی جا سکیں۔