تلنگانہ میڈیا ایکریڈیشن کے نئے قواعد اردو صحافت اور آئینی مساوات کی شاندار فتح
تلنگانہ اردو ورکنگ جرنلسٹس یونین کی تاریخی جدوجہد کامیاب، اردو و ڈیجیٹل صحافیوں کو باقاعدہ شناخت

حیدرآباد، 23 دسمبر (پریس نوٹ):
تلنگانہ حکومت کی جانب سے تلنگانہ میڈیا ایکریڈیشن 2025 کے نئے قواعد کی اجرائی کو اردو صحافت، جمہوری اقدار اور آئینی مساوات کی سمت ایک خوش آئند اور تاریخی قدم قرار دیا جا رہا ہے۔ ان نئے قواعد کے تحت اردو میڈیا کے نمائندوں اور ڈیجیٹل صحافیوں کو باضابطہ طور پر شامل کیا گیا ہے، جس پر تلنگانہ اردو ورکنگ جرنلسٹس یونین (ٹی یو ڈبلیو جے یو) کے قائدین نے مسرت، اطمینان اور قومی یکجہتی کے جذبہ کے ساتھ اپنے خیالات کا اظہار کیا ہے۔

تلنگانہ اردو ورکنگ جرنلسٹس یونین کے سرپرستِ اعلیٰ ڈاکٹر ساجد معراج نے کہا کہ یہ کامیابی کسی ایک فرد یا تنظیم کی نہیں بلکہ ان تمام اردو صحافیوں کی اجتماعی، منظم اور آئینی جدوجہد کا نتیجہ ہے جنہوں نے برسوں تک صبر، استقامت اور قانون کے دائرے میں رہتے ہوئے اپنے حقوق کے لیے آواز بلند کی۔ انہوں نے کہا کہ اردو صحافی طویل عرصہ سے لسانی امتیاز کا شکار رہے، تاہم اب آئینِ ہند میں دی گئی برابری اور انصاف کی ضمانت عملاً نافذ ہوئی ہے، جو ملک کی جمہوری روح کی عکاس ہے۔

یونین کے ریاستی صدر ڈاکٹر شجاع الدین افتخاری نے کہا کہ اردو میڈیا اور ڈیجیٹل میڈیا کو ریاستی اور ضلعی ایکریڈیشن کمیٹیوں میں نمائندگی دینا ایک دور رس اور تاریخی فیصلہ ہے۔ انہوں نے اس بات پر زور دیا کہ صحافت کی پہچان زبان کی بنیاد پر نہیں بلکہ پیشہ وارانہ اہلیت، ذمہ داری اور قومی خدمت کے جذبے سے ہونی چاہیے، اور حکومت کا یہ فیصلہ آئینِ ہند کی اسی روح کا عملی اظہار ہے۔ انہوں نے چھوٹے اخبارات کے لیے ABCD زمرہ بندی کے نظام کے خاتمے کو شفافیت اور انصاف کی سمت ایک مثبت اور قومی مفاد میں اٹھایا گیا قدم قرار دیا۔

تلنگانہ اردو ورکنگ جرنلسٹس یونین کے ریاستی سیکریٹری جنرل مفتی محمد رئیس الدین قاسمی نے کہا کہ یہ کامیابی ایک طویل، صبر آزما اور اصولی جدوجہد کا ثمر ہے۔ انہوں نے یاد دلایا کہ ماضی میں جی او 239 کے ذریعہ اردو صحافیوں کے حقوق کو متاثر کیا گیا تھا، جس کے خلاف یونین نے جمہوری اور آئینی راستہ اختیار کرتے ہوئے ہائی کورٹ سے رجوع کیا۔ عدالتِ عالیہ کے فیصلے اور اس پر مکمل عمل آوری کے نتیجہ میں آج اردو صحافیوں اور ڈیجیٹل میڈیا نمائندوں کو انصاف حاصل ہوا ہے۔

انہوں نے کہا کہ تلنگانہ اردو ورکنگ جرنلسٹس یونین نے ہمیشہ قومی یکجہتی، آئینی وفاداری اور جمہوری اقدار کو مقدم رکھا ہے، اور آئندہ بھی کسی بھی طرح کے لسانی، پیشہ وارانہ یا ادارہ جاتی امتیاز کے خلاف پرامن، قانونی اور جمہوری جدوجہد جاری رکھے گی۔

واضح رہے کہ ٹی یو ڈبلیو جے یو نے نئے قواعد کی اجرائی سے قبل ریاستی وزیر برائے اطلاعات و تعلقاتِ عامہ پی سرینواس ریڈی، کمشنر محکمہ اطلاعات و تعلقاتِ عامہ، حکومت کی مشاورتی کمیٹی اور تلنگانہ میڈیا اکیڈمی کے چیئرمین سرینواس ریڈی و دیگر عہدیداروں سے ملاقات کر کے ایک تفصیلی تحریری یادداشت پیش کی تھی، جس میں عدالتِ عالیہ کے فیصلہ (مقدمہ نمبر 12051/2019) کی کاپی بھی شامل تھی۔ حکومت کی جانب سے یونین کے تقریباً تمام مطالبات کی یکسوئی کو اردو صحافت، جمہوری نظام اور قومی اتحاد کے لیے ایک مثبت اور حوصلہ افزا پیش رفت قرار دیا جا رہا ہے۔