محبوب نگر – 23 اکتوبر (پریس نوٹ)
محبوب نگر کے ضلعی اقلیتی بہبود آفیسر جی۔ شنکرا چاری نے بتایا کہ تلنگانہ اقلیتی مالیاتی کارپوریشن (TGMFC) کے وائس چیئرمین و مینیجنگ ڈائریکٹر کے مطابق، ٹریننگ، ایمپلائمنٹ اینڈ پلیسمنٹ پروگرام اسکیم کے تحت تعلیم یافتہ بے روزگار اقلیتی نوجوانوں کو مختلف پیشہ ورانہ اور آئی ٹی مہارتوں میں مفت قلیل مدتی تربیت فراہم کی جا رہی ہے۔

اس اسکیم کا مقصد مسلم، بدھ، پارسی، سکھ اور جین برادری کے نوجوانوں کو تربیت فراہم کر کے انہیں روزگار کے بہتر مواقع دینا یا خود روزگار کے یونٹ قائم کرنے میں مدد کرنا ہے۔ تربیت نیشنل اسکل ڈیولپمنٹ کارپوریشن (NSDC) سے الحاق شدہ سرکاری و نجی تربیتی اداروں کے ذریعہ فراہم کی جائے گی تاکہ نوجوانوں کی مہارت مارکیٹ کی موجودہ مانگ کے مطابق ہو۔

جی۔ شنکرا چاری نے کہا کہ TGMFC ریاست کے معتبر تربیتی اداروں سے تجاویز (Proposals) طلب کر رہا ہے تاکہ تعلیم یافتہ اقلیتی نوجوانوں کو ہنر مندی کی تربیت فراہم کی جا سکے۔ منتخب ادارے تربیت کے بعد کامیاب امیدواروں کو روزگار بھی فراہم کریں گے۔

ضلعی اقلیتی بہبود آفیسر نے تربیتی اداروں کو ہدایت دی ہے کہ وہ اپنی تجاویز 6 نومبر 2025 شام 5 بجے سے قبل درج ذیل دستاویزات کے ساتھ جمع کرائیں:

ادارے کی رجسٹریشن / انکارپوریٹ سرٹیفکیٹ

پتہ اور رابطہ نمبر

NSDC سے الحاق شدہ سرٹیفکیٹ (لازمی)

گزشتہ تین مالی سالوں کی انکم ٹیکس ریٹرن اور آڈٹ رپورٹس

گزشتہ تین سالوں میں فراہم کردہ ہنر مندی کی تربیت کی کارکردگی

کورس مکمل کرنے کے سرٹیفکیٹس / کام کے آرڈرز

تیسرے فریق کی جانچ رپورٹ جو تربیت کے معیار کی تصدیق کرے

تربیت کی کامیابی کی دستاویزات اور تصاویر

گزشتہ سال روزگار فراہم کرنے کے ثبوت (بینک اسٹیٹمنٹس)

تربیتی مراکز کی تفصیلات اور فیکلٹی کی فہرست

جی۔ شنکرا چاری نے اہل تربیتی اداروں سے کہا کہ وہ اپنی تجاویز اور دستاویزات وقت سے پہلے جمع کروائیں اور اس موقع سے بھرپور استفادہ حاصل کریں۔

آخری تاریخ برائے تجاویز: 6 نومبر 2025