بھارت راشٹرا سمیتی (بی آر ایس) کے ورکنگ صدر کے ٹی راما راؤ (کے ٹی آر) نے تلنگانہ میں جاری سیلابی بحران پر وزیر اعلیٰ ریونت ریڈی کی لاپرواہی اور بے حسی پر سخت تنقید کی۔

کاماریڈی اور راجنہ سرسلہ اضلاع کے متاثرہ علاقوں کے دورے کے موقع پر کے ٹی آر نے الزام عائد کیا کہ حکومت نے منیرو ریزروائر میں بھاری پانی کے اخراج کے باوجود عوام کو خبردار نہیں کیا اور ان کی جانوں کے ساتھ کھیل کھیلا۔ ان کا کہنا تھا کہ ریاست کے ہیلی کاپٹر بہار میں کانگریس کے انتخابی جلسوں کے لئے استعمال کئے جانے سے امدادی کارروائیوں میں تاخیر ہوئی۔

کے ٹی آر نے کہا کہ جب عوام اپنی جان و مال گنوا رہے ہیں تب وزیر اعلیٰ ’’کل موسی دریا کی خوبصورتی اور آج اولمپکس کے انعقاد‘‘ پر جائزہ اجلاس کر رہے ہیں۔ انہوں نے ریونت ریڈی کے رویے کو ’’نیرو بادشاہ کے طرز عمل‘‘ سے تشبیہ دی جو روم جلنے کے دوران ساز بجا رہا تھا۔

کے ٹی آر نے مطالبہ کیا کہ جانی نقصان پر 25 لاکھ روپے، فی ایکڑ کھیتوں کے نقصان پر 25 ہزار روپے معاوضہ دیا جائے اور جن کے گھر تباہ ہو گئے ہیں انہیں اندرامہ مکانات فراہم کئے جائیں۔

انہوں نے افسران اور این ڈی آر ایف کے اہلکاروں کی خدمات کو سراہا جو دن رات عوام کو بچانے میں لگے ہوئے ہیں، مگر حکومت پر تنقید کرتے ہوئے کہا کہ محکمہ موسمیات کی پیشگی وارننگ کے باوجود کوئی احتیاطی اقدامات نہیں کئے گئے۔

کے ٹی آر نے مزید کہا کہ بی آر ایس کے کارکن متاثرہ علاقوں میں عوام کو پینے کا پانی اور کھانا فراہم کر رہے ہیں اور جلد ہی طبی کیمپس بھی قائم کئے جائیں گے۔

انہوں نے ریاستی اور مرکزی حکومت دونوں پر زور دیا کہ فوری اقدامات کرتے ہوئے مزید جان و مال کے نقصان کو روکا جائے کیونکہ سیلاب نے پہلے ہی راجنہ سرسلہ، کاماریڈی اور میدک اضلاع کو شدید متاثر کیا ہے۔