حیدرآباد، 23 اکتوبر پٹریاٹک ویوز ڈسک : بی آر ایس (بھارت راشٹرا سمیتی) کے کارگزار صدر کے ٹی راما راو اور سابق وزیر ٹی ہریش راو نے رامنا پیٹ میں اڈانی-امبوجا سیمنٹ فیکٹری کے خلاف احتجاج کرنے والے بی آر ایس قائدین اور ماحولیاتی کارکنوں کی نظر بندی کی سخت مذمت کی ہے۔ یہ افراد عوامی سماعت سے قبل اپنے گھروں میں نظر بند کیے گئے، جس پر دونوں رہنماوں نے فوری رہائی کا مطالبہ کیا ہے۔

کے ٹی راما راو نے کانگریس حکومت پر سخت تنقید کرتے ہوئے کہا کہ اس عمل سے اختلاف رائے کو دبانے کی کوشش کی جا رہی ہے۔ انہوں نے کہا کہ بی آر ایس قائدین اور ماحولیاتی کارکنوں کو عوامی سماعت میں شرکت سے روکنا اس بات کا ثبوت ہے کہ حکومت سیمنٹ فیکٹری کے ماحولیاتی اثرات پر کھلی بحث نہیں چاہتی۔

راما راو نے مزید کہا کہ بی آر ایس کے رہنما رویندر کمار نائک، بھوپال ریڈی، گڈاری کشور کمار، اور چیرومورتی لنگیا کی گرفتاری حکومت کی جابرانہ پالیسیوں کا حصہ ہے، اور اس کا مقصد جمہوری آوازوں کو دبانا ہے۔ انہوں نے حکومت کو چیلنج کیا کہ وہ بغیر کسی پابندی کے عوامی سماعت کا انعقاد کرے اور الزام لگایا کہ یہ سب گوتم اڈانی کے اثر میں ہو رہا ہے۔

سابق وزیر ہریش راو نے بھی ان گرفتاریوں کی مذمت کرتے ہوئے کہا کہ حکومت کو عوامی سماعت کے دوران ایسی پابندیاں لگانے پر شرم آنی چاہیے۔