حیدرآباد: بھارت راشٹرا سمیتی (بی آر ایس) کے صدر اور تلنگانہ کے سابق وزیرِ اعلیٰ کے۔ چندر شیکھر راؤ (کے سی آر) نے پارٹی کے سینئر قائد اور تحریکِ تلنگانہ کے سرگرم رکن، مرحوم کُسُما جگدیش (سابق ضلع پریشد چیئرمین، مُلگو ضلع) کے خاندان کی مالی امداد کر کے ان سے یکجہتی کا اظہار کیا۔
مرحوم کُسُما جگدیش پارٹی کے قیام سے ہی فعال طور پر وابستہ رہے تھے اور دو سال قبل علالت کے بعد ان کا انتقال ہو گیا تھا۔ پارٹی قائدین کے ذریعے کے سی آر کو یہ اطلاع ملی کہ جگدیش کی صاحبزادی سکیرتی میڈیکل کی تعلیم حاصل کرنا چاہتی ہیں۔
جمعہ کے روز ایرّاویلی واقع کے سی آر کی رہائش گاہ پر سکیرتی کو میڈیکل تعلیم کے لیے درکار فیس کا چیک حوالے کیا گیا۔ کے سی آر نے انہیں خوب دل لگا کر پڑھنے کی تلقین کی اور اس بات کا یقین دلایا کہ بی آر ایس پارٹی ان کے خاندان کے ساتھ ہر قدم پر کھڑی رہے گی۔
اس موقع پر سابق ایم ایل سی کرنے پربھاکر اور سابق ایم ایل اے رسامئی بالاکشن بھی موجود تھے۔