سنگاریڈی، 4 ستمبر (پیٹریاٹک ویوز نیوز):
ضلع پولیس محکمہ کی نگرانی میں عوام کو سائبر جرائم، ٹریفک قوانین اور سڑک حادثات سے بچاؤ کے بارے میں باخبر کرنے کے لیے سنگاریڈی شہر کے آئی بی اور پوتی ریڈی پلی چوراہوں پر پبلک ایڈریسنگ سسٹم قائم کیا گیا، جس کا آج افتتاح عمل میں آیا۔

اس نظام کا افتتاح محترم وزیر صحت و طبی امور سلاراپو دامودر راجنرسمہا کے ہاتھوں عمل میں آیا۔ اس موقع پر زہیرآباد کے ایم پی سریش شیٹکر اور ٹی جی آئی ایس سی کے چیئرمین توروپُ نرمالا جگا ریڈی بھی موجود تھے۔

تفصیلات بتاتے ہوئے ضلع ایس پی پارتوش پانکج، آئی پی ایس نے کہا کہ جدید ٹیکنالوجی سے لیس یہ پبلک ایڈریسنگ سسٹم خاص طور پر صبح اور شام کے اوقات میں، جب عوام کی بڑی بھیڑ رہتی ہے، سائبر جرائم، آن لائن فراڈ، ٹریفک قوانین اور سڑک سلامتی سے متعلق اعلانات کے ذریعے عوام میں شعور پیدا کرے گا۔

اس موقع پر وزیر صحت دامودر راجنرسمہا نے کہا کہ ضلع پولیس کا یہ اقدام عوامی بیداری کے لیے نہایت مفید ثابت ہوگا۔ انہوں نے عوام سے اپیل کی کہ وہ اس نظام سے ملنے والے پیغامات پر عمل کریں، ٹریفک اصولوں کی پابندی کریں، آن لائن دھوکہ دہی سے محتاط رہیں اور خود کو سڑک حادثات سے محفوظ رکھیں۔

اس پروگرام میں سنگاریڈی ڈی ایس پی ستیہیا گوڑ، ٹریفک انسپکٹر رام کرشنا ریڈی، سی سی ایس انسپکٹر شیوا کمار، رورل انسپکٹر کرانتی، ایس آئی رویندر کے علاوہ مقامی عوامی نمائندے، عہدیدار اور عوام نے شرکت کی۔