وزیرِاعلیٰ تلنگانہ مسٹر اے ریونت ریڈی نے کہا کہ ملک کی نوجوان نسل کے لیے راجیو گاندھی ایک عظیم تحریک ہیں، جنہوں نے قوم کی سالمیت کی خاطر اپنی جان قربان کر دی۔ وہ شہر میں منعقدہ ایک عوامی تقریب سے خطاب کر رہے تھے۔

وزیرِاعلیٰ نے کہا کہ شفاف حکمرانی کے لیے ٹیکنالوجی کو جوڑنے کا خیال سب سے پہلے راجیو گاندھی نے ہی پیش کیا تھا۔ ملک میں کمپیوٹر کا تعارف، ٹیلی کام کے شعبے میں انقلابی تبدیلیاں اور نوجوانوں کو 18 سال کی عمر میں ووٹ کا حق دینا اُن کے ہی وژن کی دین ہے۔

انہوں نے کہا کہ مقامی اداروں میں خواتین کو ریزرویشن فراہم کرنے والے بصیرت مند رہنما بھی راجیو گاندھی تھے۔ آج ہم تلنگانہ کو معاشی و سماجی طور پر ترقی کی راہ پر گامزن کرنے کے لیے اُسی تحریک سے رہنمائی حاصل کر رہے ہیں، جس سے اُس وقت حیدرآباد میں ہائی ٹیک سٹی کی بنیاد رکھی گئی تھی۔

ریونت ریڈی نے مزید کہا کہ بی سی طبقات کو 42 فیصد ریزرویشن، ایس سی طبقات کی درجہ بندی اور دیگر فلاحی اسکیمیں اسی وژن کی کڑی ہیں۔ ملک کے نوجوانوں کو چاہیے کہ وہ راجیو گاندھی کو اپنا آئیڈیل بنائیں۔

انہوں نے اعلان کیا کہ راہل گاندھی کو وزیرِاعظم بنا کر ہی ہم چین سے بیٹھیں گے۔ ساتھ ہی یہ تجویز بھی پیش کی کہ جیسے نوجوانوں کو 18 سال کی عمر میں ووٹ کا حق دیا گیا، ویسے ہی 21 سال کی عمر مکمل کرنے والوں کو اسمبلی انتخابات میں حصہ لینے کی اجازت دینے کے لیے قانون میں ترمیم کی جائے گی۔

آخر میں وزیرِاعلیٰ نے کہا کہ: "راجیو گاندھی کے خوابوں کی تکمیل کے لیے راہل گاندھی کا وزیرِاعظم بننا وقت کی اہم ضرورت ہے، اور ہم اس مقصد کے حصول تک اپنی جدوجہد جاری رکھیں گے۔”