چلڈرن اسلامک آرگنائزیشن (CIO) حیدرآباد کی جانب سے ’’مٹی میں ہاتھ، دل وطن کے ساتھ‘‘ کے سلسلے میں ملک گیر ماہ شجرکاری مہم کا اختتامی اجلاس اتوار کو اسلامک سنٹر، لکڑ کوٹ، حیدرآباد میں نہایت کامیابی اور شاندار انداز میں منعقد ہوا۔ اجلاس کی صدارت ناظم شہر جماعت اسلامی ہند، ڈاکٹر محمد مبشر احمد نے کی جبکہ مہمانِ خصوصی ڈاکٹر سرسوتی کاوُلا (رکن AIMs) بھی موجود تھے۔

اجلاس کا آغاز تلاوتِ کلامِ پاک اور اس کے اردو و انگریزی ترجمہ سے ہوا، جس کے بعد پرچم کشائی عمل اور حمد باری تعالیٰ پیش کی گئی۔ پروگرام میں CIO کا تعارف اور تنظیمی ترانہ بچوں کے گروپ نے پیش کیا، جسے حاضرین نے بے حد پسند کیا۔ علاوہ ازیں مہم کا ترانہ اور ایک پُر اثر خاموش تمثیل (Mime Act) بھی بچوں نے پیش کی جس پر سامعین نے زبردست داد دی۔

مہم کی تفصیلی رپورٹ میں بتایا گیا کہ حیدرآباد سمیت ملک کے مختلف حصوں میں ہزاروں بچوں، نوجوانوں اور رضاکاروں نے پودے لگا کر ماحولیات کے تحفظ اور شعور عام کرنے میں حصہ لیا۔

مہمانِ خصوصی ڈاکٹر سرسوتی کاوُلا نے اپنے خطاب میں CIO کے اس اقدام کو سراہا اور کہا کہ بچوں میں فطرت اور ماحولیات سے محبت بیدار کرنا وقت کی اہم ضرورت ہے۔ انہوں نے زور دیا کہ اگر ہم سب مل کر پودے لگانے اور ان کی حفاظت کی طرف توجہ دیں تو آنے والی نسلوں کے لیے ایک بہتر اور صحت مند ماحول فراہم کیا جا سکتا ہے۔

ناظم شہر ڈاکٹر محمد مبشر احمد نے خطاب کرتے ہوئے بچوں کی سرگرمیوں کو مؤثر قرار دیا اور کہا کہ والدین، خصوصاً ماؤں کا بھی اس مہم میں حصہ لینا خوش آئند ہے۔ انہوں نے کہا:
"صاف ستھرا اور صحت مند مستقبل ہماری مشترکہ ذمہ داری ہے۔ اگر ہم سب مل کر محنت کریں تو آئندہ نسلوں کو ایسا ماحول فراہم کر سکتے ہیں جہاں وہ کھلے آسمان کے نیچے کھیل سکیں اور صحت مند فضاء میں پروان چڑھ سکیں۔”

پروگرام کے اختتام پر نمایاں کارکردگی دکھانے والے بچوں، مقابلوں کے فاتحین اور رضاکاروں کو ڈاکٹر محمد مبشر احمد نے انعامات سے نوازا۔ بعد ازاں شکریہ کے کلمات ادا کیے گئے اور دعا کے ساتھ پروگرام اختتام پذیر ہوا۔

واضح رہے کہ اس مہم کے تحت شہر بھر میں بچوں اور رضاکاروں کی نگرانی میں دو ہزار سے زائد پودے لگائے گئے۔ CIO کے ذمہ داران نے کہا کہ یہ مہم مستقبل میں بھی جاری رہے گی تاکہ زیادہ سے زیادہ درخت لگا کر ملک کو سرسبز بنایا جا سکے۔ پروگرام میں بچوں نے اس بات پر زور دیا کہ ہریالی میں اضافہ نہ صرف آکسیجن کی سطح کو بہتر کرتا ہے بلکہ آنے والی نسلوں کے لیے صحت مند ماحول کی ضمانت بھی ہے۔