بھونگیر 22جنوری (پٹریاٹک ویوز) یدادری بھونگیر میں ایک پریس کانفرنس کے دوران بی آر ایس کی رکن قانون ساز کونسل اور تلنگانہ جاگروتی کی صدر کلواکنٹلہ کویتا نے کہا کہ بی آر ایس 60 لاکھ مخلص کارکنان کی ایک ناقابل تسخیر قوت ہے۔ انہوں نے واضح کیا کہ بی آر ایس عوام کی خدمت دیانتداری اور عزم کے ساتھ کرتی ہے اور کسی بھی طرح کی غنڈہ گردی یا تشدد کا سہارا نہیں لیا جاتا۔ انہوں نے کانگریس کو سخت پیغام دیتے ہوئے کہا کہ بی آر ایس کے دفاتر یا قائدین پر کسی بھی قسم کے حملے برداشت نہیں کیے جائیں گے اور کارکنان کی جانب سے مضبوط ردعمل سامنے آ سکتا ہے۔

کویتا نے کانگریس پر سخت تنقید کرتے ہوئے کہا کہ انہوں نے دریائے موسیٰ کو آلودہ رکھا اور اسے اپنے مالی فائدے کے لئے "اے ٹی ایم” میں تبدیل کر دیا۔ انہوں نے الزام عائد کیا کہ کانگریس نے غیر ضروری پروجیکٹس پر عوامی فنڈز کا غلط استعمال کیا، جس کی وجہ سے ان پروجیکٹس کی لاگت میں غیر ضروری اضافہ ہوا ہے۔ انہوں نے کہا کہ کے سی آر کی قیادت میں دریائے موسیٰ کی صفائی کے لئے اقدامات کئے گئے اور 31 ایس ٹی پیز کے قیام کے علاوہ گوداوری کے پانی کو موسیٰ سے جوڑنے کے منصوبے شروع کئے گئے ہیں۔

فلوروسیس کے مسئلے پر بات کرتے ہوئے کویتا نے کہا کہ کے سی آر حکومت نے مشن بھگیرتا کے ذریعے نلگنڈہ میں فلوروسیس کا خاتمہ کیا اور ہر گھر کو صاف اور شفاف پانی کی فراہمی ممکن بنائی۔ انہوں نے کانگریس کو آڑے ہاتھوں لیتے ہوئے کہا کہ ان کے دور حکومت میں پانی کی فراہمی کے لئے ایک بھی پلانٹ قائم نہیں کیا گیا تھا۔

کویتا نے صحت اور تعلیم کے شعبے میں بی آر ایس حکومت کی کامیابیوں کا ذکر کرتے ہوئے کہا کہ کے سی آر حکومت نے ریاست میں متعدد میڈیکل کالج قائم کیے، جبکہ کانگریس اپنی 60 سالہ حکمرانی میں ایک بھی میڈیکل کالج قائم کرنے میں ناکام رہی۔ انہوں نے ناگر جنا ساگر پروجیکٹ کے مسائل پر کانگریس کو تنقید کا نشانہ بناتے ہوئے کہا کہ آندھرا پردیش حکام تلنگانہ کے انجینئروں کو پانی کی پیمائش سے روک رہے ہیں اور کانگریس حکومت اس مسئلے پر خاموش ہے۔

پریس کانفرنس کے دوران میڈیا کے سوالات کا جواب دیتے ہوئے کویتا نے کہا کہ کانگریس اور بی جے پی ایک ہی سکے کے دو رخ ہیں۔ انہوں نے کہا کہ کانگریس جھوٹے وعدوں پر مبنی جماعت ہے، جبکہ بی جے پی کے وعدے ڈیپ فیک ثابت ہو رہے ہیں۔ انہوں نے کہا کہ تلنگانہ کے عوام کانگریس کی ناکامیوں کو سمجھ چکے ہیں اور بی آر ایس کی عوامی خدمات پر اپنا اعتماد ظاہر کر رہے ہیں۔

کویتا نے بی آر ایس کارکنان کو تلقین کی کہ وہ دیانتداری اور عزم کے ساتھ عوام کی خدمت جاری رکھیں اور عوامی مسائل کے حل کے لئے اپنی جدوجہد کو مضبوط کریں۔ انہوں نے یقین دلایا کہ بی آر ایس عوام کی خوشحالی اور ریاست کی ترقی کے لئے پرعزم ہے۔