(حیدرآباد – پیٹریاٹک ویوز، 28 اگست)

مَلّا پور چوراہے پر بہوجن چکرورتی مہاراجہ سردار سروائی پاپنا گوڑ کے مجسمے کی تنصیب کے موقع پر پارلیمانی رکن ایٹلا راجندر نے کہا کہ پاپنا گوڑ عوام کے دلوں میں ہمیشہ زندہ رہنے والے سورما ہیں۔

انہوں نے کہا کہ پاپنا گوڑ کی جرات اور قربانی عوامی خودداری کی علامت ہے۔ وہ ثابت کر گئے کہ عام انسان کا حوصلہ کسی حد تک محدود نہیں۔ اُس زمانے میں جب بادشاہ کے خلاف بولنے پر لوگوں کو قید و بند کی صعوبتوں اور اذیتوں کا سامنا کرنا پڑتا تھا، پاپنا گوڑ نے ظلم و جبر کو شکست دے کر اپنی حکمرانی قائم کی۔

ایٹلا راجندر نے کہا کہ پاپنا گوڑ کی تاریخ سن کر آج بھی رونگٹے کھڑے ہو جاتے ہیں۔ وہ نہ صرف ایک جنگجو بلکہ عوامی تحریک کے عظیم قائد تھے جنہوں نے استبداد کے خلاف ڈٹ کر لڑائی لڑی۔

انہوں نے مزید کہا کہ عظیم شخصیات کے مجسمے لگانا یا اُن کی جینتی اور برسی منانا محض رسم نہیں بلکہ اُن کی زندگیوں سے تحریک حاصل کرنے کے لیے ہوتا ہے۔ مَلّا پور چوراہے پر نصب مجسمے، چاہے وہ مہاتما جیوتی راؤ پھُولے، ساوتری بائی پھُولے، ڈاکٹر بی آر امبیڈکر یا بابو جگجیون راؤ ہوں، سب کی قربانیاں ہی آج ہمیں آزادی، خودمختاری اور آئین کی نعمتیں عطا کر رہی ہیں۔

راجندر نے کہا کہ آج جو ہم اقتدار کی جانب قدم بڑھا رہے ہیں تو اس کی اصل وجہ یہی عظیم رہنما ہیں۔ انہوں نے کہا کہ گوڑ برادری کی عظمت، جدوجہد کی روح اور قربانیوں کی تاریخ کو آنے والی نسلوں تک پہنچانے کے لیے سب کو مل کر کوشش کرنی ہوگی۔

انہوں نے کہا کہ سردار پاپنا گوڑ کی زندگی ہر ایک کے لیے مشعلِ راہ ہے۔