حیدرآباد – مرکزی وزیر کشن ریڈی نے ایک پریس کانفرنس سے خطاب کرتے ہوئے کہا کہ مرکزی حکومت نے لوک سبھا میں 130ویں آئینی ترمیمی بل پیش کیا ہے۔ اس بل کے تحت اگر وزیرِاعظم، مرکزی وزراء، وزرائے اعلیٰ یا ریاستی وزراء کسی سنگین فوجداری مقدمے میں 30 دن سے زیادہ جیل میں رہیں تو وہ اپنی وزارت سے محروم ہو جائیں گے۔

انہوں نے کہا کہ اس ترمیم کا مقصد عوامی زندگی میں اخلاقی اقدار کو مضبوط بنانا ہے۔ انہوں نے مثال دی کہ کسی بھی سرکاری ملازم کو اگر 48 گھنٹوں سے زیادہ جیل میں رہنا پڑے تو فوراً معطل کر دیا جاتا ہے، پھر وزراء پر ایسی پابندی کیوں نہ ہو؟

کشن ریڈی نے کانگریس پارٹی کے رویے پر کڑی نکتہ چینی کی اور کہا کہ یہ قانون کسی ایک پارٹی کے خلاف نہیں بلکہ سب پر یکساں طور پر لاگو ہوگا۔ انہوں نے یاد دلایا کہ ماضی میں ایل کے اڈوانی اور امیت شاہ جیسے لیڈران نے الزامات کے دوران عہدہ چھوڑا اور بے قصور ثابت ہونے کے بعد دوبارہ عوامی زندگی میں لوٹے۔ انہوں نے عام آدمی پارٹی اور تمل ناڈو کے وزراء پر الزام لگایا کہ وہ جیل میں رہتے ہوئے بھی عہدوں سے چمٹے رہے جو جمہوریت کی تذلیل ہے۔

مرکزی وزیر نے کہا کہ یو پی اے حکومت کے دوران 2جی، کامن ویلتھ گیمز اور کول اسکام جیسے بڑے اسکینڈل سامنے آئے جن کی مالیت تقریباً 12 لاکھ کروڑ روپے تھی۔ انہوں نے الزام عائد کیا کہ کانگریس ہمیشہ آئینی اداروں کو کمزور کرنے کی کوشش کرتی رہی ہے اور اندرا گاندھی نے بھی اپنے عہدے کو بچانے کے لئے آئین میں ترامیم کروائیں۔

کشن ریڈی نے کہا کہ بی جے پی نے تاریخی اصلاحات کی ہیں جن میں تین طلاق کا خاتمہ، مظلوم اقلیتوں کو شہریت، اور برطانوی دور کے پرانے قوانین کو ختم کر کے بھارتیہ نیایا سنہیتا نافذ کرنا شامل ہے۔

کھاد (یوریا) کے مسئلے پر بات کرتے ہوئے وزیر نے کہا کہ عالمی سطح پر مشکلات کے باوجود حکومت ہند نے کسانوں کے لئے سبسڈی اور وافر مقدار میں یوریا کی فراہمی کو یقینی بنایا ہے۔ انہوں نے بتایا کہ تقریباً 50 ہزار میٹرک ٹن یوریا تلنگانہ کے لئے راستے میں ہے۔ انہوں نے الزام عائد کیا کہ ریاستی حکومت کی بدانتظامی اور غیر ضروری بیانات کی وجہ سے کسانوں میں گھبراہٹ پھیلی۔

انہوں نے کہا کہ گزشتہ 11 برسوں میں کبھی یوریا کی قلت پیدا نہیں ہوئی اور کسانوں کے مفاد کے لئے مرکز ہمیشہ ذمہ دارانہ رویہ اختیار کرتا رہا ہے۔

کشن ریڈی نے اپنے خطاب کے اختتام پر کہا کہ یہ ترمیم اور دیگر اقدامات سیاسی فائدے کے لئے نہیں بلکہ جمہوریت کو مضبوط بنانے اور حکمرانی میں شفافیت لانے کے لئے ہیں۔