نئی دہلی: 28نومبر (پٹریاٹک ویوز) کیرالہ کی وائناڈ لوک سبھا سیٹ پر شاندار کامیابی حاصل کرنے کے بعد کانگریس کی رہنما پرینکا گاندھی واڈرا نے آج لوک سبھا کی رکنیت کا حلف لیا-

لوک سبھا اسپیکر اوم برلا نے ایوان کی کارروائی کے آغاز پر محترمہ پرینکا گاندھی کو حلف دلایا۔ انہوں نے وائناڈ کے ضمنی انتخاب میں چار لاکھ سے زائد ووٹوں کے فرق سے تاریخی جیت حاصل کی تھی۔

یہ سیٹ عام انتخابات میں ان کے بھائی راہل گاندھی نے جیتی تھی، جو اتر پردیش کی رائے بریلی سیٹ کے ساتھ وائناڈ سے بھی منتخب ہوئے تھے۔ تاہم، بعد میں انہوں نے وائناڈ سیٹ سے استعفیٰ دے کر اپنی بہن کو میدان میں اتارنے کا فیصلہ کیا۔

محترمہ پرینکا گاندھی نے حلف برداری کے لیے اپنی والدہ، کانگریس پارلیمانی پارٹی کی لیڈر سونیا گاندھی، اور بھائی راہل گاندھی کے ساتھ پارلیمنٹ ہاؤس کمپلیکس پہنچ کر شرکت کی۔

حلف لینے کے بعد وہ راہل گاندھی کے ساتھ لوک سبھا گئیں، جہاں ارکان پارلیمنٹ نے ان کا خیرمقدم کیا۔