محبوب نگر: 9 نومبر (پٹریاٹک ویوز) یوم اردو کے موقع پر ضلع پریشد میٹنگ ہال میں ایک عظیم تہنیتی تقریب کا انعقاد کیا گیا، جس میں ترقی پانے والے اور نو منتخب اردو اساتذہ کو خراج تحسین پیش کیا گیا۔ اس تقریب کی صدارت خواجہ قطب الدین، ریاستی صدر اردو ٹیچرز اسوسی ایشن تلنگانہ اسٹیٹ نے کی، جبکہ رکن اسمبلی سرینواس ریڈی، عبید اللہ کوتوال، عبدالہادی، ناگرکرنول کے اے ایم اوز اور ابن عثمان ٹرسٹ کے معتمد عمومی محمد شکیل احمد نے خصوصی شرکت کی اور اپنے خیالات کا اظہار کیا۔

رکن اسمبلی سرینواس ریڈی نے اپنے خطاب میں اردو زبان کی اہمیت کو اجاگر کرتے ہوئے کہا کہ اردو ہماری تہذیبی شناخت ہے اور اس کی ترقی میں اساتذہ کا اہم کردار ہے۔ انہوں نے ترقی پانے والے اساتذہ کو مبارکباد دی اور ان کی ذمہ داریوں کی طرف توجہ دلائی، ساتھ ہی یہ وعدہ کیا کہ شہر محبوب نگر میں عنقریب اقبال مینار کا سنگ بنیاد رکھا جائے گا۔

جناب عبید اللہ کوتوال نے اردو زبان کی تاریخی اور ثقافتی اہمیت پر روشنی ڈالتے ہوئے کہا کہ اساتذہ کی ترقی تعلیمی معیار میں بہتری لائے گی اور اردو زبان کے فروغ میں نئی جان ڈالے گی۔ انہوں نے اسوسی ایشن کی کارکردگی پر خوشی کا اظہار کیا اور ضلعی و ریاستی سطح کے ذمہ داران کو مبارکباد پیش کی۔

محبوب نگر اور ناگرکرنول کے اے ایم اوز نے اساتذہ سے درخواست کی کہ وہ طلباء میں اردو زبان کی محبت کو فروغ دیں اور تعلیمی معیار کو مزید بہتر بنائیں۔ ابن عثمان ٹرسٹ کے معتمد عمومی نے بھی ترقی پانے والے اور نومنتخب اساتذہ کو مبارکباد دی اور انہیں اردو زبان کی خدمت کے لیے مزید محنت کرنے کی ترغیب دی۔

تقریب کے دوران انصاری بن احمد باوزیر، ریاستی نائب صدر نے نظامت کے فرائض سرانجام دیے۔ اس موقع پر اردو ٹیچرز اسوسی ایشن کے دیگر اراکین بھی موجود تھے جن میں محمد سلام خان، محمد اعجاز علی، غلام دستگیر، شیخ خالد، محمد ماجد محی الدین، محمد امتیاز، نعیم صدیقی، نجم الدین، محمد طاہر، کوثر شہناز، نسرین سلطانہ، صغرا جبین اور ثناء ہاشمی شامل ہیں۔

اختتام پر اساتذہ کی خدمات کو سراہا گیا اور انہیں تہنیتی گلدستے پیش کیے گئے۔ تقریب کے اختتام پر اردو زبان کی ترقی اور فروغ کے لیے اجتماعی دعا بھی کی گئی۔