حیدرآباد: 27اکٹوبر (پٹریاٹک ویوز) بی آر ایس کے سینئر رہنما کے ٹی راما راؤ نے حالیہ الزامات اور منفی پروپیگنڈے کو شدید تنقید کا نشانہ بناتے ہوئے کہا کہ "ہم عوام کے لیے لڑتے رہیں گے، چاہے اس کی قیمت ہماری جان کیوں نہ ہو۔” انہوں نے ریونت ریڈی اور حکومت پر کرپشن اور ناکامیوں کے انکشاف کے بعد بے بنیاد مقدمات اور سیاسی انتقام کے الزامات عائد کیے ہیں۔

کے ٹی آر نے واضح کیا کہ "تلنگانہ کی تحریک میں شامل ہوتے وقت ہم موت کے خطرے کا سامنا کرچکے ہیں۔ جھوٹے مقدمات اور حکومتی سازشیں ہمارے لیے نئی نہیں ہیں۔” انہوں نے کہا کہ ریاست میں گیارہ ماہ سے بے ترتیبی چل رہی ہے، اور بی آر ایس کے لیڈرز، جو کے سی آر کے بتائے راستے پر چل رہے ہیں، ریونت ریڈی کی کرپشن کو بے نقاب کرنے پر جھوٹے مقدمات میں پھنسائے جا رہے ہیں۔

کے ٹی آر نے حکومت پر تنقید کرتے ہوئے کہا کہ "یہ حکومتی سازش ہے کہ ایک خاندان کے دیوالی کے موقع پر نجی اجتماع کو منشیات پارٹی کا رنگ دیا جا رہا ہے۔” راج پاکالا نے اپنی رہائش گاہ پر فیملی فنکشن منعقد کیا تھا، جسے غلط انداز میں "ریو پارٹی” قرار دیا جا رہا ہے۔

انہوں نے کہا کہ "یہ راج پاکالا کا گھر تھا، کوئی فارم ہاؤس نہیں، اور تحقیقات کے بعد یہ ثابت ہوچکا ہے کہ نہ تو کوئی منشیات ملی اور نہ ہی کوئی غیر قانونی سرگرمی۔” کے ٹی آر نے کہا کہ "ابتدائی طور پر یہ معاملہ شراب کی مقدار پر تھا، پھر اسے منشیات کیس بنایا گیا۔”

کے ٹی آر نے ریونت ریڈی کی کرپشن اور بی جے پی و کانگریس کے جھوٹے پروپیگنڈے پر برہمی کا اظہار کرتے ہوئے کہا کہ وہ کسی بھی صورت میں عوام کو ان کی ناکامیوں اور جھوٹ سے آگاہ کرتے رہیں گے۔