حیدرآباد 15اکٹوبر 2024 (پٹریاٹک ویوز ڈسک )سابق وزیر اور ایم ایل اے ہریش راؤ نے کانگریس حکومت پر شدید تنقید کرتے ہوئے کہا کہ بی سی طلباء کے ساتھ غفلت برتنا ناقابلِ قبول ہے۔ انہوں نے مہاتما جیوتیبا پھولے بی سی اوورسیز ودیا ندھی اسکیم کے تحت منظور شدہ فنڈز کی فوری اجرائی کا مطالبہ کیا۔ سابق بی آر ایس حکومت نے اس اسکیم کے ذریعے طلباء کو بیرون ملک اعلیٰ تعلیم کے لیے مالی معاونت فراہم کرنے کا منصوبہ بنایا تھا، تاہم 65 مستحق طلباء ابھی تک معاونت کے منتظر ہیں، اور ان کے تعلیمی خواب تاخیر کی وجہ سے خطرے میں پڑ گئے ہیں۔

ہریش راؤ نے سوال اٹھایا کہ آیا کانگریس حکومت اوورسیز فیلوشپ اسکیم کو ختم کرنے کا ارادہ رکھتی ہے، جو کے سی آر نے متعارف کروائی تھی۔ انہوں نے کہا کہ طلباء کے مستقبل کو غیر یقینی صورتحال کا شکار بنانا کانگریس حکومت کی ناکامی ہے۔

ہریش راؤ نے زور دیتے ہوئے کہا “کانگریس حکومت اسکیموں کے نام اور علامتوں میں تبدیلیاں کرنے میں تو جلدی دکھا رہی ہے، لیکن وعدے پورے کرنے میں ناکام ہو رہی ہے،” ۔