حیدرآباد: سٹی پولیس کمشنر وی سی سجنار نے گنیش تہوار کے پیش نظر زیرو ٹالرنس سکیورٹی پلان نافذ کرنے کے احکامات جاری کرتے ہوئے بھاری تعداد میں مسلح پولیس اہلکار تعینات کرنے کا اعلان کیا ہے۔ پہلی مرتبہ حیدرآباد میں گنیش منڈپوں کی ڈیجیٹل جیو ٹیگنگ، چوبیس گھنٹے سائبر نگرانی اور ٹریفک راستوں کی خصوصی صفائی و نگرانی کا نظام نافذ کیا جائے گا۔

ہفتہ کے روز سینئر پولیس افسران کے ساتھ جائزہ اجلاس سے خطاب کرتے ہوئے سجنار نے خبردار کیا کہ امن و امان میں خلل ڈالنے کی کسی بھی کوشش کے خلاف فوری قانونی کارروائی کی جائے گی۔ انہوں نے بونالو تہوار کے تجربات سے سبق حاصل کرتے ہوئے تمام اسٹیشن ہاؤس افسران (SHOs) کو ہدایت دی کہ امن کمیٹیوں اور گنیش منڈپ منتظمین کے ساتھ مسلسل رابطہ برقرار رکھا جائے۔

کمشنر نے کہا کہ ہر گنیش منڈپ کا پولیس پورٹل پر اندراج لازمی ہوگا اور منتظمین کو مقررہ موبائل ایپ کے ذریعے منڈپ کی جیو ٹیگنگ کرنا ہوگی۔ انہوں نے ہدایت دی کہ منڈپوں پر قطاروں کے لیے بیریکیڈنگ اور الگ سی سی ٹی وی کیمرے نصب کیے جائیں تاکہ چوری، ہنگامہ آرائی اور زیادہ ہجوم کی صورت میں حادثات سے بچا جا سکے۔

فرقہ وارانہ اشتعال انگیزی کے خلاف سخت موقف اختیار کرتے ہوئے سجنار نے بتایا کہ خصوصی سائبر نگرانی کا نظام فعال کر دیا گیا ہے۔ آئی ٹی سیل اور مقامی نیٹ ورک یونٹس سوشل میڈیا پلیٹ فارمز پر چوبیس گھنٹے نظر رکھیں گے اور اشتعال انگیز مواد، نفرت انگیز تقاریر یا افواہیں پھیلانے والوں کی نشاندہی کرکے ان کے خلاف سخت قانونی کارروائی کریں گے۔

انہوں نے کہا کہ شمشاد آباد اور راجندر نگر زونز کے سٹی پولیس حدود میں شامل ہونے کے بعد بالاپور سے خیرت آباد بڑے گنیش تک مرکزی جلوس کے راستوں کی ذمہ داری اب سٹی پولیس پر عائد ہوتی ہے۔ زونل افسران کو ہدایت دی گئی ہے کہ وہ پیشگی معائنہ مکمل کریں تاکہ بڑے گنیش مجسموں کی منتقلی بغیر کسی رکاوٹ کے انجام دی جا سکے۔

ٹریفک پولیس سائبرآباد اور راچاکونڈہ پولیس کمشنریٹس کے ساتھ مل کر مربوط ٹریفک ڈائیورژن پلان نافذ کرے گی تاکہ اہم مقامات پر ٹریفک جام سے بچا جا سکے۔ اسپیشل برانچ اور ٹاسک فورس کے افسران کو بھی ہدایت دی گئی ہے کہ وہ نمایاں پولیسنگ کرتے ہوئے بڑی تعداد میں آنے والے عقیدت مندوں کے ساتھ تحمل اور صبر سے پیش آئیں۔

اجلاس میں ایڈیشنل کمشنر آف پولیس (کرائمز) ایم سِرینواسولو، ایڈیشنل کمشنر آف پولیس (لاء اینڈ آرڈر) تفسیر اقبال، جوائنٹ کمشنر آف پولیس (اسپیشل برانچ) ایس ایم وجئے کمار اور مختلف زونز کے ڈی سی پیز نے شرکت کی۔