حیدرآباد، 29 اگست: حیدرآباد میٹرو ریل لمیٹڈ (HMRL) کے ایڈیشنل منیجنگ ڈائریکٹر بی. اجیت ریڈی نے متعلقہ تمام سرکاری محکموں کے عہدیداروں کو پرانے شہر کے میٹرو ریل توسیعی منصوبے سے متعلق کاموں میں تیزی لانے کی ہدایت دی ہے۔

اجیت ریڈی نے ہفتہ کو میٹرو کوریڈور کے ساتھ جاری سڑک کی توسیع کے کاموں کا معائنہ کیا۔ میٹرو ریل کے چیف انجینئر ایس. بھاسکر ریڈی کے ہمراہ انہوں نے دارالشفا سے چندرائن گٹہ تک 7.5 کلومیٹر طویل راستے کا جائزہ لیا۔

معائنے کے دوران انہوں نے جائیدادوں کے حصول کی صورتحال کا جائزہ لیا۔ متاثر ہونے والی 888 جائیدادوں میں سے 833 جائیدادیں حاصل کی جاچکی ہیں جبکہ مزید 55 جائیدادوں کا حصول باقی ہے۔ ان میں تاریخی اور قدیم عمارتیں بھی شامل ہیں، جن کے لیے خصوصی توجہ کی ضرورت ہے۔

اجیت ریڈی نے عہدیداروں کو بجلی کی لائنوں، بجلی کے کھمبوں اور پانی کی پائپ لائنوں سمیت دیگر یوٹیلیٹیز کی محفوظ منتقلی کا کام تیز کرنے کی ہدایت دی تاکہ میٹرو منصوبے میں رکاوٹ پیدا نہ ہو۔

انہوں نے زمین کے حصول کا عمل مکمل ہونے والے علاقوں میں متاثرہ ڈھانچوں اور دیگر اثاثوں کو جلد ہٹانے کی بھی ہدایت دی۔ انہوں نے تمام سرکاری محکموں کے درمیان بہتر تال میل کے ذریعے رائٹ آف وے (RoW) جلد از جلد حاصل کرنے پر زور دیا۔

ایڈیشنل ایم ڈی نے کہا کہ پرانے شہر کے میٹرو منصوبے کے کاموں پر مقامی باشندے خوشی کا اظہار کر رہے ہیں اور تعاون فراہم کر رہے ہیں۔ انہوں نے مختلف مشکلات کے باوجود زمین کے حصول کا عمل مکمل کرنے پر ریونیو عہدیداروں کی کوششوں کو سراہا۔

معائنے کے موقع پر HMRL، GHMC، میٹرو واٹر ورکس اور ریونیو محکموں کے سینئر عہدیدار موجود تھے۔