English 
بی آر ایس کے کارگزار صدر کے ٹی راما راؤ کی صحافیوں کی گرفتاری کی سخت مذمتکیا یہی جمہوریت کے تحفظ کے نام پر کانگریس کی ساتویں ضمانت ہے؟۔کے ٹی آر کا سوال ۔۔
حیدرآباد -27-دسمبر
(چؤایس نیوز)
بھارت راشٹرا سمیتی (بی آر ایس) کے کارگزار صدر جناب کے ٹی راما راؤ (کے ٹی آر) نے ریاست میں صحافیوں کی گرفتاری اور حراست پر شدید ردِعمل ظاہر کرتے ہوئے کانگریس حکومت پر سخت تنقید کی ہے۔ انہوں نے کہا کہ صحافی عوام کی آواز ہوتے ہیں اور انہیں گرفتار کرنا و حراست میں لینا کانگریس کی آمرانہ ذہنیت کا کھلا ثبوت ہے۔
کے ٹی آر نے سوال کیا کہ کیا جمہوریت کے تحفظ کے نام پر دی گئی کانگریس کی یہ ساتویں ضمانت ہے؟ انہوں نے کہا کہ آزادیٔ صحافت کسی بھی جمہوری نظام کی بنیاد ہوتی ہے، لیکن موجودہ حکومت صحافیوں کو دبانے اور ان کی آواز خاموش کرنے کی کوشش کر رہی ہے، جو ناقابلِ قبول ہے۔
بی آر ایس پارٹی کی جانب سے کے ٹی راما راؤ نے مطالبہ کیا کہ صحافیوں کی امنگوں اور حقوق کے خلاف جاری کیا گیا گورنمنٹ آرڈر (GO) فوری طور پر منسوخ کیا جائے۔ انہوں نے واضح کیا کہ بی آر ایس پارٹی صحافی برادری کے ساتھ کھڑی ہے اور آزادیٔ اظہارِ رائے کے تحفظ کے لیے ہر سطح پر جدوجہد جاری رکھے گی۔
انہوں نے خبردار کیا کہ اگر صحافیوں کے خلاف کارروائیاں بند نہ کی گئیں تو بی آر ایس پارٹی سڑکوں سے لے کر ایوانوں تک جمہوری طریقے سے شدید احتجاج کرے گی۔(چؤایس نیوز)
