ڈپٹی چیف منسٹر بھٹی وکرمارکا ملّو نے کہا کہ سیمنٹ اور اسٹیل کی صنعتوں کو اندیرامّا ہاؤسنگ اسکیم کی کامیابی کے لئے حکومت کے ساتھ کھڑا ہونا ہوگا، جو عوامی حکومت کا ایک عظیم فلاحی اور انسانی ہمدردی پر مبنی مشن ہے۔

منگل کو ڈاکٹر بی۔ آر۔ امبیڈکر سکریٹریٹ میں وزیر صنعت شری دھر بابو کے ساتھ منعقدہ خصوصی اجلاس میں انہوں نے اپیل کی کہ کمپنیاں غریبوں کے مکانات کی تعمیر میں سیمنٹ اور اسٹیل کم قیمت پر اور معیاری انداز میں فراہم کریں۔ انہوں نے کہا کہ ’’جس طرح تیلنگانہ نے صنعتوں کو سہارا دیا ہے، اب وقت ہے کہ صنعتیں بھی تیلنگانہ کے عوام کا ساتھ دیں۔‘‘

حکومت نے 4.50 لاکھ مکانات کی تعمیر کے لئے 22,500 کروڑ روپے مختص کئے ہیں۔ وزیر شری دھر بابو نے کہا کہ تمام کمپنیاں یکساں قیمت پر سامان فراہم کریں اور اس اسکیم کو عوامی حکومت کی نئی تاریخ قرار دیا۔

عہدیداروں نے بتایا کہ 50 لاکھ میٹرک ٹن سیمنٹ اور 27.75 لاکھ میٹرک ٹن اسٹیل درکار ہوگا۔ صنعت کاروں نے کہا کہ وہ اس انسان دوست مشن کا حصہ بننے پر فخر محسوس کرتے ہیں اور مکمل تعاون فراہم کریں گے۔